នាព្រឹកថ្ងៃទី២០ ខែកុម្ភៈ ឆ្នាំ២០២២ ឯកឧត្តម ហែម ខន អនុប្រធានគណៈកម្មការទី១០ ព្រឹទ្ធសភា អមដំណើរដោយឯកឧត្តម ទេព មាន ទីប្រឹក្សាសម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងលោក ហ៊ុយ ស៊ីធឿន សមាជិកក្រុមប្រឹក្សាស្រុកសំរោងទង បានអញ្ជើញជួបសំណេះសំណាលជាមួយអាជ្ញាធរឃុំខ្ទុំក្រាំង ដើម្បីស្វែងយល់ពីផែនការត្រៀមរៀបចំការបោះឆ្នោតនាពេលខាងមុខ វឌ្ឍនភាពនិងបញ្ហាប្រឈមនៃការអភិវឌ្ឍឃុំ (ពី២០១៧-២០២២) ការរៀបចំគោលនយោបាយអភិវឌ្ឍន៍ឃុំឆ្នាំ២០២២- ២០២៧ តុល្យភាពថវិកាឃុំ និងការងារបង្ការទប់ស្កាត់ជំងឺកូវីដ-១៩ ស្ថិតនៅឃុំខ្ទុំក្រាំង ស្រុកសំរោងទង ខេត្តកំពង់ស្ពឺ។
បន្ទាប់មក ឯកឧត្តម បានបន្តជួបសំណេះសំណាលសួរសុខទុក្ខជាមួយចាស់ជរាទីទ័លក្រចំនួន ២១នាក់ និងបាននាំយកអំណោយចែកជូន ដោយក្នុងម្នាក់ៗទទួលបាន ភួយ០១, ក្រមា០១, សៀវភៅធម៌ ០១ក្បាល, ថវិកា ៣០,០០០រៀល និងអាហារ ០១កញ្ចប់ (នំបុ័ង ០១, ត្រីខ ០១, ទឹកសុទ្ធ ០១)។ ដោយឡែកអាជ្ញាធរឃុំចំនួន១០នាក់ ក្នុងម្នាក់ៗទទួលបាន ក្រម៉ា ០១, សៀវភៅធម៌ ០១ក្បាល, ថវិកាចំនួន ២០,០០០រៀល និងអាហារ ០១កញ្ចប់ (នំបុ័ង ០១, ត្រីខ ០១, ទឹកសុទ្ធ ០១) ដោយចំណាយថវិកាសរុបចំនួន ១,៧១៥,០០០ រៀល។
